En Marea insta a Feijóo e a Escotet a aclarar o posicionamento da Xunta e de Abanca con respecto á previsión de venda das hidroeléctricas do Xallas

Trala declaración da posta en marcha do proceso de venda das centrais hidroeléctricas do Río Xallas e a incertidume que está xerando nos traballadores de Ferroatlántica e na Costa da Morte, a En Marea amosa a súa sorpresa de que Ferroatlántica fale de vender os saltos do Xallas cando actualmente, e de acordo coa documentación  disponible,  a propiedade (pleno dominio) deles correspóndelle a Abanca en virtude dos contratos asinados por Ferroatlántica en maio de 2012.

Abanca é cotitular da concesión de explotación das centrais hidroeléctricas, que son xestionadas por Ferroatlántica en réxime de leasing (contrato asinado o 25/05/2012), por importe de 120 millóns de euros, que vence no 2023, e cun principal pendente de amortización de 77 millóns de euros a 31/12/2015.  Este contrato de leasing ten como garantia de pago un dereito real de prensa sobre determinados contratos asinados por Ferroatlántica cunha compañía eléctrica e foi cedido por Abanca a un consorcio de bancos, reservándose en todo caso Abanca unha parte e a opción de compra.  De feito, todos estes datos constan nas contas anuais do Grupo Villar Mir do exercicio 2015 (as últimas depositadas no rexistro mercantil) e nas contas de Ferroatlántica do exercicio 2013, que se adxuntan ao final desta nota.

Publicidade Xornal Galego:

“Quen ten todas as cartas na man para decidir como se resolve este asunto tan trascendente, que abre a posibilidade dun expolio total dos nosos recursos naturais, son a Xunta de Galicia e Abanca”, sinala o vicevoceiro de En Marea Antón Sánchez, que considera que o deber da Xunta de Galicia é defender o interés xeral dos galegos e galegas, e neste caso dos habitantes da Costa da Morte e os traballadores de Ferroatlántica,e  evitar que se especule cunha concesión que foi outorgada coa condición da unidade da actividade hidoreléctrica e das fábricas de ferroaleacións, cuestión que xustificaba o seu interés xeral. Dende En Marea esíxenlle a Feijóo que “debe de garantir e manifestar claramente o cumplimento da legalidade, non sabemos a que responde a súa indefinición neste asunto, pero esiximos que manifeste xa que se vai cumplir coa legalidade e que polo tanto, non se vai consentir a segregación das actividades”.

Abanca entidade propietaria dos saltos e cotitular do título concesional, xestiona perto do 40% do aforro dos galegos, e “non pode permitir actuacións especulativas que supoñan un expolio da economía do país, senón poñerse do lado da economía galega e non do señor Villar Mir, por eso pedimos ao señor Escotet que actúe en consecuencia”, conclúe Sánchez.

EN MAREA COS TRABALLADORES DE FERROATLÁNTICA

O portavoz de En Marea, Luís Villares, xunto co viceportavoz, Antón Sánchez, e os deputados de En Marea, Juan Merlo e Francisco Casal, sumaranse a manifestación convocada para esta tarde na praza do Concello de Cee baixo o lema “As nosas centrais non se venden, Non á segregación das actividades de enerxía e ferroalaxes. O grupo parlamentario de En Marea quere unha vez máis facer público o seu apoio aos traballadores de Ferroatlántica e insta ao Goberno galego a asumir o compromiso coa defensa dos postos de traballo como xa fixo o voceiro Luís Villares no debate de investidura de Alberto Núñez Feijóo, e que quedou sen resposta algunha por parte do presidente da Xunta de Galicia.