Uns 25 millóns de brasileiros entre 14 e 29 anos non estudan

Uns 25 millóns de brasileiros entre 14 e 29 anos non estudan A maioría alegou razóns relacionadas co traballo para non estudar. Por Ana Cristina Campos Reporteira de Agência Brasil Río de Janeiro A Enquisa Nacional Continua por Mostraxe de Domicilios (PNAD) de 2016, divulgada polo Instituto Brasileiro de Xeografía e Estatística, revelou que 24,8

Uns 25 millóns de brasileiros entre 14 e 29 anos non estudan
A maioría alegou razóns relacionadas co traballo para non estudar.
Por Ana Cristina Campos Reporteira de Agência Brasil Río de Janeiro

A Enquisa Nacional Continua por Mostraxe de Domicilios (PNAD) de 2016, divulgada polo Instituto Brasileiro de Xeografía e Estatística, revelou que 24,8 millóns das persoas de entre 14 e 29 anos de idade non frecuentaban escola ou calquera outro curso de cualificación profesional o ano pasado.

Unha parte delas alegou non estar a estudar debido a que traballaba, estaba a buscar traballo ou conseguira un emprego e comezaría pronto (41%); a outros lles faltaba interese en continuar os estudos (19,7%); e había os que tiñan quefaceres domésticos ou necesitaban coidar un neno, adolescente, ancián ou persoa con necesidades especiais (12,8%).

Os motivos relacionados co mercado de traballo foron máis frecuentes entre os homes (50,5%). Ademais, entre eles, o 24,1% dixeron non ter interese, e o 8,2% xa concluíran o nivel de estudo que desexaban.

Para as mulleres, razóns relacionadas co traballo tamén foron as máis frecuentes (30,5%), pero o 26,1% delas alegaron quefaceres domésticos ou coidar outra persoa, proporción 30 veces superior á observada entre os homes. As que non tiñan interese en estudar sumaron o 14,9%.

En Brasil, había 51,6 millóns de persoas de 14 a 29 anos de idade o ano pasado. Dese total, o 13,3% estaban ocupadas e estudaban; o 20,5% non traballaban e non estudaban; o 32,7% non traballaban, pero estudaban; e o 33,4% estaban ocupadas e non estudaban.

Entre os homes nese grupo de idade, o 14,7% non traballaban nin estudaban. No caso das mulleres, esa porcentaxe chegou ao 26,4%. En canto a cor ou raza, a maior diferenza entre os grupos estaba entre os que non traballaban nin estudaban: o 16,6% entre as de cor branca e o 23,3% entre as negras ou pardas.