UPTA Galicia, protagonista no V Congreso Supranacional de Pemes de Comercio e Turismo do Eixo Atlántico

PUBLICIDADE EN XORNAL GALEGO

Ourense, 7 de xuño de 2010.
A Unión de Profesionais e Traballadores Autónomos de Galicia participou no V Congreso Supranacional de Pemes de Comercio e Turismo do Eixo Atlántico colaborando na organización e intervindo en dúas mesas redondas para abordar temas estratéxicos para estes sectores. O congreso tivo lugar en Ourense durante os pasados días 4, 5 e 6.
A organización do Congreso correspondeu a OSPEA, unha entidade que agrupa federacións e asociacións de pemes dos sectores do comercio, do turismo e da artesanía de Galicia, Asturias, Cantabria, Castela-León e das rexións do norte e do centro de Portugal. Dada a situación económica que está a afectar substancialmente a estes sectores, OSPEA optou porque o congreso servise para o intercambio de propostas e experiencias para a dinamización do mercado.
Lisardo Domínguez, secretario xeral de UPTA Galicia, foi o encargado de presentar a mesa redonda sobre o traballo autónomo. Como relatora nesta mesa participou María Jesús González Paradela, responsable do Departamento Xurídico, achegando o punto de vista da asociación sobre a importancia do fomento do emprego autónomo para loitar contra as altas taxas de paro.
Julia González Andrade, técnico en desenvolvemento rural de UPTA Galicia e licenciada en Historia da Arte, interveu na mesa redonda “Propostas turísticas para o século XXI”. En concreto, referiuse ao concepto de “interpretación do patrimonio” como elemento potenciador de novas oportunidades de negocio nos espacios naturais.

PUBLICIDADE EN XORNAL GALEGO

Deixa unha resposta